காரைக்குடி: காலத்தைக் கடந்து நிற்கும் பிரம்மாண்டமான வணிக மாளிகைகள், சூழலியலுக்கு ஏற்ற நகரமைப்பு மற்றும் ஆன்மீக நிலப்பரப்புகள் நிறைந்த செட்டிநாட்டின் தொன்மையை மீளுருவாக்கம் செய்யும் நோக்கில் ‘தி லோட்டஸ் பேலஸ்’ மற்றும் ‘தி பார்க்’ குழுமம் இணைந்து ‘கலை’ (Kalai) என்ற கலை மற்றும் கட்டிடக்கலை திருவிழாவை ஒருங்கிணைத்தன.
செட்டிநாட்டை வெறும் பழமை விரும்பிகளின் வரலாற்றுப் பொக்கிஷமாகவோ, வெறும் பாதுகாக்கப்பட்ட பாரம்பரியச் சின்னமாகவோ பார்க்காமல், வர்த்தகப் பரிமாற்றம், காலநிலைக்கு ஏற்ற வாழ்வியல், சமூக அதிகார படிநிலைகள் மற்றும் கூட்டு நினைவுகளால் உருவான ஒரு முழுமையான பண்பாட்டு அமைப்பாக இத்திருவிழா ஆய்வு செய்தது.
பர்மிய தேக்கு மரச் செதுக்கல்கள், ஆத்தங்குடி டைல்களின் கணிதவியல் வடிவங்கள், பெல்ஜியம் கண்ணாடிகள், சுண்ணாம்பு பூச்சு சுவர்கள் மற்றும் மங்கிப்போன புகைப்படம் எனச் சிறு சிறு துண்டுகளாகப் பார்க்கப்படும் செட்டிநாட்டின் பிம்பத்தைத் தாண்டி, அதன் பின்னணியில் இருந்த வர்த்தகம், காலநிலை, உழைப்பு மற்றும் நிதி அமைப்புகளை இத்திருவிழா வெளிச்சத்திற்குக் கொண்டுவந்துள்ளது.
நிறுவனமாகச் செயல்பட்ட வீடுகள்
இத்திருவிழாவின் தொடக்க நிகழ்வாக, 200 ஆண்டுகள் பழமையான லோட்டஸ் பேலஸ் மாளிகையில் கட்டிடக்கலை நிபுணர் சுஜாதா சங்கர் சிறப்புரையாற்றினார். செட்டிநாட்டு வீடுகளின் திட்டமிடல் தர்க்கத்தை விளக்கிய அவர், “தென்கிழக்கு ஆசிய நாடுகளில் வர்த்தகம் மற்றும் வட்டித் தொழில் செய்து ஈட்டிய பெரும் செல்வத்தைப் பாதுகாக்கும் வகையில் இந்த மாளிகைகளின் உயர்ந்த காம்பவுண்ட் சுவர்கள் அமைக்கப்பட்டன. தெருவிற்கும் வீட்டிற்கும் இடைப்பட்ட பகுதியில் அமைந்த ‘திண்ணை’ என்ற உயர்த்தப்பட்ட பகுதிதான் வணிகப் பரிமாற்றங்களின் மையமாகத் திகழ்ந்தது,” என்றார். பர்மா, இலங்கை உள்ளிட்ட தென்கிழக்கு ஆசிய நாடுகளுக்குப் பரவியிருந்த வங்கியியல் பிணையங்கள் இந்த அரை-பொதுவெளியில்தான் கையாளப்பட்டன.
பொதுவாக, வீட்டின் முன்புற முற்றம் வணிகம் மற்றும் பொதுத் தொடர்புகளுக்கும், உள் முற்றங்கள் குடும்ப வாழ்க்கை மற்றும் தனியார் சேவைகளுக்கும் பயன்படுத்தப்பட்டன. இந்த மாளிகைகளின் மேல் தளத்திற்குச் செல்லும் படிக்கட்டுகள் சீராக அமைக்கப்பட்டிருந்தாலும், அறைகளின் கதவு நிலைகள் மிகக் குறைந்த உயரத்திலேயே அமைக்கப்பட்டிருந்தன. இது குறித்துச் மெட்ராஸ் டிசைன் ஸ்டோரியைச் சேர்ந்த லட்சுமி உலகம்மாயி மற்றும் அவரது தாயார் சிவகாமி விளக்குகையில், கதவுகளின் குறைந்த உயரம், அறைக்குள் நுழையும் ஒவ்வொருவரையும் இயல்பாகவே தலைவணங்க வைக்கும் வகையில் வடிவமைக்கப்பட்டுள்ளது; அன்றாட வாழ்வின் நகர்விலேயே மரியாதையை வலியுறுத்தும் நுட்பம் இதுவாகும் எனக் குறிப்பிட்டனர்.
வறண்ட நிலத்தில் தொலைநோக்கு நகரமைப்பு
முன்னாள் இந்தியக் குடியிருப்புகள் திட்டமிடலின்றி உருவானவை என்ற கூற்றைப் பொய்யாக்கும் வகையில் செட்டிநாடு திகழ்கிறது. காவிரிப்பூம்பட்டினம் (பூம்புகார்) கடல் கோளால் மூழ்கிய வரலாற்று நினைவுகளைச் சுமந்த நகரத்தார் சமுதாயம், காரைக்குடியைச் சுற்றியுள்ள 74 கிராமங்களில் தொலைநோக்குப் பார்வையுடன் கூடிய குடியிருப்புகளை உருவாக்கினர்.
சீரற்ற மழைப்பொழிவு கொண்ட வறண்ட நிலப்பகுதியில், வெள்ளக் கட்டுப்பாடு மற்றும் நீர் மேலாண்மைக்காக வடிகால் அமைப்புகளும், கோயில் குளங்களும் ஒன்றோடொன்று இணைக்கப்பட்டன. அகலமான தெருக்கள் காற்றோட்டத்தையும் வீதிகளின் ஊர்வலங்களையும் சாத்தியமாக்கின. மழைநீர் தடையின்றி வெளியேற முற்றங்கள் சற்றே உயர்ந்த தளத்தில் அமைக்கப்பட்டன. மேலும், ஆண்களின் வர்த்தகப் பயணங்களின் போது, வீட்டின் கணக்கு வழக்குகளையும் மாளிகைப் பராமரிப்பத்தையும் பெண்களே முன்னின்று நடத்தினார்கள்.
புனிதமான புவியியல் அமைப்புகள்
திருமயம் கோட்டை மற்றும் கோயில் வளாகத்தில் வரலாற்று ஆசிரியர் முனைவர் பிரதீப் சக்கரவர்த்தி சுற்றாற்றுப் பயண வழிகாட்டுதலை மேற்கொண்டார். 17ஆம் நூற்றாண்டில் சேதுபதி மன்னர்கள் காலத்தில் செதுக்கப்பட்ட இக்கோயில், இயற்கையான பாறை அமைப்புகளைச் சிதைக்காமல் உருவாக்கப்பட்டுள்ளது. இங்கு சைவம் மற்றும் வைணவத் திருத்தலங்கள் இணைந்துள்ளன.
இறை வழிபாட்டின் போது கண்கள் மூடி நிற்கும் நிலையைச் சுட்டிக்காட்டிய கட்டிடக்கலை நிபுணர் சுஜாதா சங்கர், ஆன்மீக மரியாதை என்பது காட்சி இன்பத்தில் இல்லை, மாறாகக் காட்சியற்ற அக அமைதியிலேயே உள்ளது என்ற கருத்து முன்னெடுக்கப்பட்டது.
பொருளாதார வளர்ச்சிக்குச் செட்டியார்களின் பங்களிப்பு
சிதம்பர விலாஸ் ரிசார்ட் மேலாளர் செந்தில்குமார் பீமன் பேசுகையில், 19 மற்றும் 20ஆம் நூற்றாண்டுகளில் பிரிட்டிஷ் ஆட்சியாளர்களின் பாரபட்சமான கடன் கொள்கைகளுக்கு மாற்றாக, தென்கிழக்கு ஆசியாவில் செட்டியார்கள் மூலதனத்தையும் பணப்புழக்கத்தையும் வழங்கினர் என்றார்.
இலங்கையில் தென்னை, ரப்பர், தேயிலை; பர்மாவில் அரிசி, ரத்தினக் கற்கள், தேக்கு; மலேசியாவில் தகரம், ரப்பர்; வியட்நாமில் அரிசி; தென்னாப்பிரிக்கா மற்றும் மொரிஷியஸில் சர்க்கரை ஆலைகள் விரிவடைய நகரத்தார்களின் நிதி உதவி முக்கியக் காரணமாக அமைந்தது. மேலும், இந்தியன் வங்கி, இந்தியன் ஓவர்சீஸ் வங்கி, மதுரை வங்கி (தற்போது ஐசிஐசிஐ வங்கியுடன் இணைக்கப்பட்டது) மற்றும் யுனைடெட் இந்தியா இன்சூரன்ஸ் போன்ற உள்நாட்டு நிதி நிறுவனங்களை உருவாக்குவதிலும் அவர்கள் முன்னோடியாகத் திகழ்ந்தனர்.
வெறிச்சோடிய கிராமங்களும் எஞ்சிய வரலாற்று நினைவுகளும்
இன்று இம்மாளிகைகளை உருவாக்கிய பெரும்பாலான குடும்பங்கள் புலம்பெயர்ந்துவிட்ட நிலையில், இந்த பிரம்மாண்ட வீடுகள் வர்த்தகக் காலத்தின் மௌன சாட்சிகளாக மட்டுமே நிற்கின்றன.
சிதம்பர விலாஸ் மாளிகையின் நுழைவாயிலில் நின்றிருந்த மெலிந்த உடலமைப்பைக் கொண்ட ராஜபாளையம் அல்லது சிப்பிப்பாறை ரக வேட்டை நாய் ஒன்று, வணிகமும் வாழ்வும் செழித்தோங்கிய காலத்தில் பாதுகாப்பிற்கும் தோழமைக்கும் அடையாளமாக இருந்த இந்த விலங்குகள், இன்று மக்கள் வெளியேறிய வெறிச்சோடிய கிராமங்களில், விட்டுச்செல்லப்பட்ட வரலாற்றின் அமைதியான நினைவூட்டலாக உலா வருகின்றன.
